Seferberiya neteweyî ji bo Kurdî
- Hevserokê Înstîtuta Kurdî ya Lêkolîn û Zanistê Fevzî Ozmen qala xebatên înstîtutê kir.
Li paytexta Elmanyayê Berlînê, sala 1994´an Înstîtuta Kurdî ya Lêkolîn û Zanistê hat damezrandin. Serokê wê yê pêşî Porf. Dr. Îsmet Şerîf Wanli bû. Wê kitêbxaneyek jî ava kiribû ku li mekanê wê yê li Berlînê xizmet dida. Bi navê 'Lêkolîn' weşaneke wê ya perîyodîk heye û ew kitêbên ilmî li ser Kurd û Kurdistanê diweşîne. Ji ber hin sedemên teknîkî, Înstîtutê navenda xwe bir Dusseldorfê. Hevserokê wê Mamoste Fevzî Ozmen dibêje, “Statuya înstîtûtê komele ye û ji bo raya giştî dixebite. Encama xebatên konferans, komxebat, semîner, panêl û yên din yan di kovara Lêkolîn de yan jî weke pirtûk diweşîne.”
Ew ji nebûna derfetên madî û kesên pispor gazinan dike: “Mijarên ku em tê de zorê dibînin, pirgirêkên aborî û kêmasiya kesên pispor e. Yek jî helwêsta dewleta Elman a siyasî ye. Li eyaleta NRW´yê saziya me wek saziyeke nêzî PKK´ê tê dîtin. Ji ber vê heta îro me ti alîkarî ji wezarata çandê ya NRW´ê negirtiye.” Lê ji bo li pey xwe hiştina van zehmetiyan çi hewldanên wan hene nabêje.
Gava em xebatên zimanê dayikê, bi minasebeta 21´ê Sibatê Roja zimanê dayikê ya cîhanê bi bîr dixin ew dibêje, “Giraniya vê pirgirêkê çend komele û kes nikarin ragirin. Pirsgirêk neteweyî ye û di heman demê de siyasî ye.
Em wek Înstîtûta Kurdî li Elmanyayê, bi saziyên wek Yekîtiya Mamosteyên Kurd-YMK, Kurd-Akad, YXK û Yekmal e.V. re dixebitin. Lê divê em bi hişmendiyeke neteweyî û bi awayekî seferberî nêzî vê pirsgirêkê bibin.”
Projeyên Înstîtutê yên halê hazir
Hevserokê Înstîtuta Kurdî ya Lêkolîn û Zanistê Fevzî Ozmen li ser xebatên xwe yên dikin û yên li pêşiya wan hene ev agahiyên li jêr dan:
Di van çend mehên dawî de me pirtûka Xanê Agal a ku li ser jiyana Şehîd Binevş Agal (Bêrîvan) e, çap kir. Kovara Lêkolînê jî hejmara xwe ya 20´an bi naverokeke mezin a kurdolojiyê bi 180 rûpelî, niha li ber çapê ye. Ev hejmara kovarê encama waneyên online e ku li ser pêşniyaza Zanîngeha Rojava, Înstîtuta Kurdî Lêkolîn û Zanîstê û Yekîtiya Mamosteyên Kurd, bi pêşengiya Îbrahîm Seydo Aydogan, hatibûn amadekirin. Tê de nivîsên I. Seydo Aydogan, zimanzan Michael Chyet, Michiel Leezenberg, Abdulwehab Xalid Mûsa û gelek kesên hêja hene. Bi navê dosyayê KURDOLOJÎ tê weşandin.
Pirtûka dersê ya kursa bilind [“PERSPEKTÎF”-Dersên Rêzimana Kurdî (Kurmancî)] ji nû ve di ber çavan re hat derbaskirin û çû çapê.
Kursên ziman yên ji ber Pandemiya Koronayê hatine rawestin, wê bên domandin.
Konferansa bi minasebata 21ê Sibatê Roja Zimanê Dayîkê ya Navneteweyî ku diviyabû li Zanîngeha Dortmundê pêk bihata, dîsa bi minasebeta Pandemiya koronayê taloqî meha gulana 2021´ê bû.
Pirtûka kursa zimanê kurdî “Kurdî A1-A2” bi hevkariya Înstîtûta Kurdî û YMK´ê hatiye amadekirin û wê di demeke pirr nêzîk de biçe çapê.”
Yenî Özgürpolitika
VEYSÎ IŞIK - DUSSELDORF
Şemî 20 Sibat 2021 - 01:05